ᑖᒃᑯᓇᓐᖓᑦ ᓵᓪ ᑭᐊᓇᑎ, ᖃᕆᓴᐅᔭᓕᕆᓂᕐᒧᑦ ᐃᓕᓴᐃᔨ − ᓄᓇᓕᖕᓄᑦ ᐃᓕᓐᓂᐊᖅᑎᑦᑎᔭᖅᑐᖅᐸᒃᑐᑦ, Ampere-ᑯᓐᓂᑦ
ᑖᒃᑯᐊᒃ ᒥᑦᑎᒪᑕᓕᒃ ᖃ ᐅᓱᐃᑦᑐᕐᓗ ᓄᓇᕗᒻᒥᑦ ᐅᑭᐅᖅᑕᖅᑐᒦᓛᖑᕘᒃ ᓄᓇᓕᖕᓂᑦ , ᐊᑐᓂᑦ ᐃᓂᖃᖅᐴᒃ ᖁᑦᑎᒥᑦ ᐅᑭᐅᖅᑕᖅᑐᒥᑦ.
ᒥᑦᑎᒪᑕᓕᒃ - ᒥᑦᑎᒪᑕᓕᒃ ("ᒥᑦᑎᒪᐅᑉ ᐃᓂᒋᓚᐅᖅᑕᖓ") ᐊᕙᓗᔭᐅᓯᒪᕗᖅ ᐊᐅᔪᐃᑦᑐᓄᑦ ᖃᖅᑲᓄᓪᓗ ᐊᐳᑎᓕᖕᓄᑦ. ᐊᖏᕐᕋᕆᔭᐅᔪᖅ ᐊᔾᔨᒌᙱᑦᑑᑎᓄᑦ ᐃᒪᕐᒥᐅᑕᓄᑦ ᓄᓇᒥᐅᑕᓄᓪᓗ ᐆᒪᔪᓄᑦ, ᓇᑦᑎᓐᓇᒃ ᐃᓕᖅᑯᓯᓕᕆᕝᕕᒃ, ᕿᑭᖅᑕᓂ ᐃᓕᓐᓂᐊᕐᕕᐅᑉ ᐊᐅᓚᓂᖓᑕ ᐊᖓᔪᖅᑳᖃᕐᕕᖓ, ᓄᓇᓕᖕᓂ ᐳᓚᕋᖅᑐᓕᕆᔨᓄᑦ, ᐅᓇᑕᖅᑐᒃᓴᓄᑦ ᐃᓂᒋᔭᐅᓪᓗᓂ, ᐃᓄᒋᐊᒃᓯᕙᓪᓕᐊᓪᓗᓂᓗ 1,500 ᐅᖓᑖᓂ. ᐊᓯᖏᑦ ᓄᓇᓖᑦ ᖃᓂᒋᔭᖏᓐᓃᑦᑐᑦ ᓄᓇᓕᖕᓂᑦ!
ᒥᑦᑎᒪᑕᓕᒃ − ᒥᑦᑎᒪᑕᓕᒃ ᐊᔾᔨᐅᙱᑦᑐᒥᒃ ᐊᒃᑐᐊᓂᖃᖅᐳᖅ ᖃᐅᓱᐃᑦᑐᒧᑦ − ᖃᐅᓱᐃᑦᑐᒧᑦ ("ᓄᓇ ᖃᐅᒪᓂᖃᙱᑦᑐᖅ"). ᐃᓄᖏᑦ ᑭᖑᕚᕆᔭᐅᕗᑦ ᑎᑭᑎᑕᐅᕙᓚᐅᖅᑐᓄᑦ ᐃᓄᒡᔪᐊᕐᒥᙶᖅᑐᓂᒃ, ᓄᓇᕕᖕᒥ (ᑯᐸᐃᒃ ᑕᕐᕋᖓᓂ), ᓅᑕᐅᓚᐅᖅᓯᒪᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐅᓇᑕᕕᒡᔪᐊᕐᓇᑎᓪᓗᒍ ᓇᖕᒥᓂᖃᓕᕈᒪᓪᓗᑎᒃ ᐅᑭᐅᖅᑕᖅᑐᒥ, ᐊᒻᒪᓗᑦᑕᐅᖅ ᑭᖑᕚᕆᔭᐅᔪᑦ ᐱᖓᓱᓄᑦ ᒥᑦᑎᒪᑕᓕᖕᒥᐅᓄᑦ ᐊᐅᓪᓚᖅᑎᑕᐅᓚᐅᖅᓯᒪᔪᓄᑦ ᐃᓕᓐᓂᐊᖅᑎᑦᑎᔭᖅᑐᖅᖢᑎᒃ ᐃᓄᒃᔪᐊᕐᒥᐅᓂᒃ ᖃᓄᖅ ᐊᓐᓇᐅᒪᔪᓐᓇᕐᓂᕐᒥᒃ ᖁᑦᑎᒃᑐᒥ ᐅᑭᐅᖅᑕᖅᑐᒥ.
ᐊᑐᖅᖢᑎᒃ ᑕᖅᑭᓂᒃ ᐱᖓᓱᓂᒃ ᑖᖅᑐᒻᒪᕆᐊᓘᓪᓗᓂ ᐅᓐᓄᐊᒃᑯᓪᓗ ᓯᕿᓐᓂᖅᐸᒃᖢᓂ, 183-ᖑᔪᑦ ᖃᐅᓱᐃᑦᑐᕐᒥᐅᑕᐅᖏᓐᓇᖅᑐᑦ ᖃᐅᔨᒪᔭᐅᕗᑦ ᓴᐱᓕᖅᓴᕋᐃᙱᓐᓂᖏᓐᓂᒃ ᓂᒡᓚᓱᒃᑐᐊᓘᒐᓗᐊᖅᑎᓪᓗᒍ ᓇᓄᕐᓂᒡᓗ ᖃᓂᒋᔭᖃᖅᐸᒃᖢᑎᒃ, ᐊᒻᒪᓗᑦᑕᐅᖅ ᑐᙵᓇᑦᑎᐊᖅᐸᖕᓂᖏᓐᓄᑦ ᓄᓇᖅᑲᑎᒌᑦᑎᐊᖅᖢᑎᒃ. ᖃᓄᖅ ᐊᖏᑎᒋᒐᓗᐊᖅᐸᑕ, ᑲᑎᓯᓚᐅᖅᐳᒍᑦ ᑲᔪᓯᓂᖃᑦᑎᐊᖅᑐᓂᒃ ᓇᖕᒥᓂᖅᓱᖅᑎᓂᒃ, ᐃᓕᓴᐃᔨᑦᑎᐊᕙᖕᓂᒃ, ᐃᓅᓯᓕᒫᒧᑦ ᐃᓕᑦᑎᕙᓪᓕᐊᔪᓂᒃ, ᐃᓐᓇᕐᓂᒡᓗ ᖃᐅᔨᒪᓂᖃᑦᑎᐊᖅᑐᓂᒃ, ᑕᒪᕐᒥᑦᑎᐊᕐᓗ ᐃᑲᔪᖅᐸᒃᖢᑎᒃ ᖃᐅᑕᒫᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᑕᒪᑐᒧᖓ ᐊᔾᔨᖃᙱᑦᑐᒧᑦ ᓄᓇᓕᖕᓄᑦ.
ᐳᓛᕆᐊᖅᓯᒪᓪᓗᑎᒃ ᑕᒪᐃᓐᓄᑦ ᕼᐋᒻᓚᒋᔭᐅᔪᓄᑦ ᓯᑎᐱᕆᐅᓚᐅᖅᑐᒥ, ᓄᓇᓕᖕᓂ ᑲᔪᓯᑎᑦᑎᓂᕐᒧᑦ ᐱᓕᕆᖃᑎᒌᑦ ᐃᖅᑲᐃᓯᔭᐅᓚᐅᖅᐳᑦ ᖃᓄᖅ ᑐᑭᖃᑦᑎᐊᖅᑐᒥᒃ ᐃᓚᐅᑎᑦᑎᕙᖕᓂᕐᒥᒃ ᐱᕙᓪᓕᐊᕙᖕᒪᖔᑦ ᐊᕐᕌᒍᓂ ᐊᓂᒍᖅᐸᓪᓕᐊᔪᓂ ᖃᓄᕐᓗ ᐊᖏᑎᒋᔪᒥᒃ ᐅᑎᕐᓂᕆᔭᕗᑦ ᐊᑐᕐᓂᖃᖅᑎᒋᔪᓐᓇᕐᒪᖔᑦ ᐃᓄᖕᓄᑦ.
ᐅᓪᓗᑦᑎᓐᓂ ᐱᓕᕆᓚᐅᖅᐳᒍᑦ ᑐᓂᓯᓪᓗᑕ ᑖᓂᐊᓪ ᒨᕐ ᑕᕆᐅᕐᔪᐊᕐᒥ ᐱᐅᖅᓱᐊᕐᓂᕐᒧᑦ ᑲᑎᖅᓱᖅᓯᒪᔪᓂ ᐃᓕᓐᓂᐊᕐᕕᖕᓂ ᐃᓕᓴᐃᓪᓗᑕᓗ ᐃᓐᓇᕐᓄᑦ ᖃᕆᓴᐅᔭᒃᑰᕈᓐᓇᐅᑎᓂᒃ ᓄᓇᓕᖕᓂ. ᐅᓐᓄᒃᑯᑦ, ᑭᓯᐊᓂ, ᐃᓅᖃᑎᒌᑦᑎᐊᓕᖅᐹᓪᓕᕐᓇᓚᐅᖅᐳᖅ.
ᐱᖃᑎᒋᓪᓗᒋᑦ ᐅᑎᖅᑐᑦ ᐃᓕᓐᓂᐊᖃᑕᐅᔪᑦ ᑭᖑᓂᑦᑎᓐᓂ ᐃᓕᓐᓂᐊᖅᓯᓐᓈᑦ ᑲᑎᒪᓚᐅᖅᑎᓪᓗᒋᑦ, ᐱᓱᔪᓚᐅᖅᐳᒍᑦ, ᐊᖑᓇᓱᒃᖢᑕ, ᐳᐃᔾᔪᕋᖅᖢᑕ, ᐃᙱᑲᑕᒃᖢᑕ, ᐊᒻᒪ ᐃᒡᓚᑲᑕᒃᖢᑕ ᐅᓐᓄᐊᒃᑯᑦ. ᐃᒃᓯᕚᖃᑎᒋᓚᐅᕆᕙᕗᑦ ᑕᐃᒃᑯᐊ ᕿᒃᓵᒃᑐᑦ ᐃᓚᙵᓵᓚᐅᖅᑐᓂᒃ ᖃᐅᔨᒪᓕᖅᑕᑦᑎᓐᓂᒃ, ᐃᖅᑲᐅᒪᔭᑦᑎᓐᓂᒃ ᐅᖃᐅᓯᖃᖅᖢᑕ ᕿᐊᔾᔪᑎᒋᕙᒃᖢᑎᒍᑦ ᖁᕕᐊᓇᖅᑐᒃᑯᓪᓗ.
ᑕᒪᒃᑯᐊ ᐊᑐᖅᓯᒪᔭᖏᑦ ᐊᑑᑎᖃᓪᓚᕆᓚᐅᖅᑐᑦ ᓲᖃᐃᒻᒪ ᐅᑎᕐᓂᖅ ᓄᓇᓕᖕᓄᑦ ᑕᑯᒃᓴᐅᑎᑦᑎᖕᒪᑦ ᐊᖏᖅᓯᒪᓂᑦᑎᓐᓂᒃ ᐱᖃᓐᓇᕇᖕᓂᕐᒧᑦ, ᑲᔪᓯᑎᑦᑎᓪᓗᓂ ᓄᑖᓂᒃ ᐃᑎᔪᓂᒃ ᐃᓕᓐᓂᐊᖃᑎᒌᖕᓂᒃᑯᑦ. ᐅᑭᐅᖅᑕᖅᑐᒥᐅᑕᐅᖅᑰᔨᓕᓚᐅᖅᓯᒪᙱᓇᑦᑕ, ᐅᓪᓘᑉ ᐃᓚᐃᓐᓇᖓᓂᐅᒐᓗᐊᖅᐸᑦ, ᓂᕆᐅᒃᐳᒍᓪᓗ ᓇᓂᓯᒃᑲᓐᓂᓛᕐᓂᑦᑎᓐᓂᒃ ᐃᑲᔪᖃᑎᒌᒍᓐᓇᕐᓂᑦᑎᓐᓂᒃ ᐱᕈᖅᐸᓪᓕᐊᓂᑦᑎᓐᓂ ᓯᕗᓂᒃᓴᑦᑎᓐᓂ.
Ampere−ᑯᑦ ᐊᑐᖅᐸᖕᓂᕆᔮ
ᑐᓴᓚᐅᖅᓯᒪᕕᑦ ᑖᔅᓱᒥᖓ Ampere−ᑯᑦ ᐊᑐᖅᐸᖕᓂᕆᔮᓃᑦ? ᑕᑯᒃᓴᐅᑎᑦᑎᕗᖅ ᖃᓄᖅ ᐃᑲᔪᖅᑐᐃᕙᖕᒪᖔᑦᑕ ᐃᓕᓐᓂᐊᖅᑎᓂᒃ ᓄᓇᓕᕋᓛᖑᓂᖅᓴᓂ, ᐅᖓᓯᒃᑐᒦᑦᑐᓂᒃ, ᐊᒻᒪ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᒃ ᓇᐅᒃᑯᓕᒫᖅ ᐃᓅᓯᖏᓐᓂ ᐊᒻᒪ ᐃᓕᑦᑎᕙᓪᓕᐊᓂᖏᓐᓂ. ᐊᑐᕈᓐᓇᕐᓂᕗᑦ ᐅᑯᓂᖓ ᐃᓚᖃᖅᐳᖅ:
- ᑭᒡᒐᖅᑐᐃᓂᖅ − ᐃᑲᔪᖅᓱᕐᓗᒋᑦ ᓄᓇᓕᕋᓛᖑᓂᖅᓴᑦ, ᐅᖓᓯᒃᑐᒦᑦᑐᑦ, ᐊᒻᒪ ᓄᓇᖃᖅᑳᖅᓯᒪᔪᑦ ᓄᓇᓕᖏᑦ
- ᑲᔪᖏᖅᓴᐃᔪᓕᕆᓂᖅ − ᓂᐱᓂᒃ ᖁᕝᕙᓯᒃᑎᑦᑎᒋᐊᕐᓂᖅ ᐊᒻᒪ ᐊᔪᕈᓐᓃᖅᐸᓪᓕᐊᓂᖅ
- ᓴᖅᑭᑎᑦᑎᕙᓪᓕᐊᓂᖅ - ᓴᙱᓂᖅᑖᖅᑎᑦᑎᓂᖅ ᓴᖅᑭᑎᑦᑎᔨᓂᒃ ᓯᕗᓕᖅᑎᓂᒡᓗ
- ᐃᓕᓐᓂᐊᕐᓂᓕᕆᓂᖅ − ᒪᓂᒪᑎᑦᑎᓂᖅ ᐱᓕᕆᓪᓚᑦᑖᕐᓗᑎᒃ, ᓄᑖᙳᖅᐸᓪᓕᐊᔪᓂᒃ−ᐊᐅᓚᑕᐅᔪᓂᒃ ᐃᓕᑦᑎᕙᓪᓕᐊᓂᕐᒥᒃ
- ᐃᑲᔫᑎᒃᓴᑦ − ᐊᔾᔨᒌᒃᑎᑦᑎᓗᑎᒃ ᐃᓕᓐᓂᐊᖅᑎᓕᒫᑦ
- ᐃᖅᑲᓇᐃᔮᖃᕐᓂᖅ - ᓴᖅᑭᑦᑎᓂᖅ ᓄᓇᓕᖕᓂ, ᑲᔪᓰᓐᓇᕈᓐᓇᖅᑐᓂᒃ STEAM−ᒧᑦ ᐃᖅᑲᓇᐃᔮᒃᓴᓂᒃ
ᒥᑦᑎᒪᑕᓕᖕᒥ ᖃᐅᓱᐃᑦᑐᒥᓪᓗ, ᓄᓇᓕᖕᓂ ᑲᔪᓯᑎᑦᑎᓂᕐᒧᑦ ᐱᓕᕆᖃᑎᒌᑦ ᐱᑎᑦᑎᓚᐅᖅᐳᑦ ᑭᒡᒐᖅᑐᐃᓂᕐᒥᒃ, ᑲᔪᖏᖅᓴᐃᔪᓕᕆᓂᕐᒥᒃ, ᐃᓕᓐᓂᐊᖅᑎᑦᑎᓂᕐᒥᒃ, ᐊᑐᖅᑕᐅᔪᓐᓇᖅᑐᓂᒡᓗ ᓄᓇᓕᖕᒥᐅᓄᑦ ᐃᓕᓐᓂᐊᖅᑎᓄᑦ ᓯᑎᐱᕆᒥ ᐳᓛᕆᐊᖅᓯᒪᑎᓪᓗᒋᑦ!