ᑐᓴᒐᒃᓴᑦᑎᐊᕙᒃ, Ampere-ᑯᑦ ᐊᒻᒪ TD ᑮᓇᐅᔭᒃᑯᕕᒃ ᐊᑐᐃᓐᓇᐅᓕᖅᐳᑦ ᐊᒃᓱᕈᕐᓇᖅᑐᒃᑯᑦ
ᑕᐃᑲᓂ 2024−ᒥᑦ, Ampere−ᑯᑦ (ᐱᓐᖑᐊᖅ ᑲᑐᔾᔨᖃᑎᒌᖑᓚᐅᖅᑐᑦ) ᐃᓚᐅᓚᐅᖅᑐᖅ TD-ᒧᑦ ᑮᓇᐅᔭᒃᑯᕕᖕᒧᑦ ᐊᑐᐃᓐᓇᐅᓂᕐᒧᑦ ᐊᒃᓱᕈᕐᓇᖅᑐᒧᑦ, ᑲᒪᓇᖅᑐᒻᒪᕆᒃ ᐱᒋᐊᖅᑎᑕᐅᓯᒪᔪᖅ TD ᑮᓇᐅᔭᒃᑯᕕᖕᒧᑦ. 2024-ᒥ ᐊᒃᓱᕈᕐᓇᕐᓂᐅᔪᖅ ᐊᐱᕆᓚᐅᖅᑐᖅ ᑐᓂᕐᕈᓯᐊᖅᑎᑦᑎᓲᓂᒃ ᐊᒻᒪᓗ ᑮᓇᐅᔭᓕᐅᕋᓱᐊᖅᑎᐅᖏᑦᑐᓂᒃ ᑲᑐᔾᔨᖃᑎᒌᓂᒃ ᑐᒃᓯᕋᐅᑎᓕᐅᖁᓪᓗᒋᑦ ᓄᑖᓂᒃ ᐊᑐᖅᑕᐅᔪᓐᓇᖅᑐᓂᒃ ᐃᑲᔪᖅᑐᐃᔾᔪᑕᐅᓂᐊᖅᑐᓂᒃ ᐱᔨᑦᑎᕋᖅᑕᐅᙱᓗᐊᖅᑐᓄᑦ ᒥᑭᑦᑐᓄᑦ ᓇᖕᒥᓂᖃᖅᑎᐅᔪᓄᑦ ᐱᕙᓪᓕᐊᑎᑦᑎᖁᓪᓗᒋᑦ ᓇᖕᒥᓂᖁᑎᒥᓂᒃ, ᓄᑖᒥᒃ ᓇᖕᒥᓂᖁᑎᑖᖁᓪᓗᒋᑦ, ᐅᕝᕙᓘᓐᓃᑦ ᐱᕈᖅᑎᑦᑎᖁᓪᓗᒋᑦ ᓇᖕᒥᓂᖁᑎᒋᔭᒥᓂᒃ.
ᔮᓄᐊᕆᒥ, ᑲᐃᑦᓕᓐ ᐹᑐᓴᓐ, Amere-ᑯᑦ ᐊᐅᓚᑦᑎᔨᖓ, ᐊᒻᒪᓗ ᑖᓄ ᐱᒃ ᑲᓅ, ᑐᑭᒧᐊᒃᑎᑦᑎᔨᖓ ᑕᕐᕆᔭᓕᐅᕐᓂᕐᒧᑦ, ᐃᓚᐅᓚᐅᖅᐳᑦ ᑭᖑᓪᓕᖅᐹᒥ ᖃᐅᔨᓴᕐᓂᐅᔪᒥ TD-ᑯᑦ ᐅᑭᐅᖅᑕᖅᑐᒥ ᐊᒥᐊᓕᑲᒥ ᐊᐅᓚᑦᑎᔨᖏᓐᓄᑦ ᐃᖅᑲᖅᑐᐃᔨᓄᑦ ᑭᖑᓪᓕᖅᐹᖑᓚᐅᖅᑎᓪᓗᒋᑦ.
ᑕᐃᖕᓇ ᑐᓂᓯᓂᐅᔪᖅ ᑲᔪᓯᑦᑎᐊᓚᐅᖅᑐᖅ, ᐊᒻᒪᓗ ᖁᕕᐊᓱᒃᐳᒍᑦ ᑐᓴᖅᑎᑦᑎᔭᕆᐊᒃᓴᖅ Ampere-ᑯᑦ ᑐᒃᓯᕋᐅᑎᖓ ᐊᖏᖅᑕᐅᓚᐅᕐᒪᑦ ᑐᓂᔭᐅᓂᐊᕐᓗᓂ 2024-ᒥ TD-ᒧᑦ ᐊᑐᐃᓐᓇᐅᓂᕐᒧᑦ ᐊᒃᓱᕈᕐᓇᖅᑐᓄᑦ.
ᑐᒃᓯᕋᐅᑎᒋᔭᕗᑦ: ᐊᖏᒡᓕᒋᐊᖅᑎᑦᑎᓂᖅ ᒥᑭᑦᑐᓂᒃ ᓇᖕᒥᓂᕆᔭᐅᔪᓂᒃ (ᓄᓇᓕᕋᓛᓂᑦ, ᐅᖓᓯᒋᔭᐅᔪᓄᑦ ᓄᓇᓕᖕᓄᑦ, ᐊᒻᒪᓗ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ)
ᐅᕝᕙᐅᓇ ᓇᐃᓈᖅᓯᒪᔪᖅ ᓵᓚᒃᓴᓚᐅᑎᕗᑦ ᑐᒃᓯᕋᐅᑎᑦᑎᓐᓄᑦ, ᑕᐃᔭᐅᔪᖅ “ᐊᖏᓪᓕᒋᐊᖅᑎᑦᑎᓂᖅ ᒥᑭᑦᑐᓂᒃ ᓇᖕᒥᓂᕆᔭᐅᔪᓂᒃ”:ᐊᖏᓪᓕᒋᐊᖅᑎᑦᑎᓂᖅ ᒥᑭᑦᑐᓂᒃ ᓇᖕᒥᓂᕆᔭᐅᔪᓂᒃ”:
ᑐᕌᒐᕆᔭᕗᑦ ᐋᖅᑭᒃᓱᐃᔪᒪᓪᓗᑕ ᑕᐃᒪᐃᒃᑲᓐᓂᕈᓐᓇᖅᑐᒥᒃ, ᒪᑭᒪᐃᓐᓇᕈᓐᓇᖅᑐᒥᒃ, ᐊᒻᒪᓗ ᐊᖏᓪᓕᒋᐊᖅᑕᐅᔪᓐᓇᖅᑐᒥᒃ ᐱᓕᕆᐊᒥᒃ ᐃᑲᔪᕐᓂᐊᖅᑐᒥᒃ ᑮᓇᐅᔭᓕᐅᓗᐊᓐᖏᑦᑐᓂᒃ ᓯᕗᓂᒃᓴᒥ ᓇᖕᒥᓂᖃᖅᑎᐅᓂᐊᖅᑐᓂᒃ ᐱᔨᑦᑎᕋᖅᑕᐅᑦᑎᐊᖏᑦᑐᓂᑦ ᓄᓇᓕᕋᓛᖑᓂᖅᓴᓄᑦ, ᐅᖓᓯᒋᔭᐅᔪᓂᑦ ᓄᓇᓕᖕᓂᑦ, ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᓄᓇᓕᖏᓐᓂ ᐱᕙᓪᓕᐊᑎᑦᑎᓗᑎᒃ, ᐱᒋᐊᖅᑎᑦᑎᓗᑎᒃ, ᐊᒻᒪᓗ ᐱᕈᖅᑎᑦᑎᓗᑎᒃ ᒥᑭᑦᑐᓂᒃ ᓇᖕᒥᓂᕆᔭᐅᔪᓂᒃ.
ᑕᒪᑐᒪᓂ ᐊᕐᕌᒎᖕᓄᑦ ᒪᕐᕉᖕᓄᑦ ᐱᓕᕆᐊᖑᔪᒥ, Ampere−ᑯᑦ ᑐᓂᓯᓂᐊᖅᐳᖅ ᐃᓕᓐᓂᐊᕐᓂᐅᔪᓂᑦ ᐱᓕᕆᓂᐅᔪᒥᑦ ᐊᒻᒪ ᐊᑐᐃᓐᓇᐅᑎᑦᑎᓗᓂ ᐃᑲᔪᖅᓱᐃᓂᐅᔪᒥᑦ ᐊᒻᒪ ᐱᔨᑦᑎᕋᕐᓂᐅᔪᓂᑦ ᑎᑭᓪᓗᒍ 500−ᒧᑦ ᓇᖕᒥᓂᖃᕈᓐᓇᖅᑐᓄᑦ ᑎᑭᓪᓗᒍ 12−ᒧᑦ ᓄᓇᓕᕋᓛᖑᔪᓂᖅᓴᓄᑦ, ᐅᖓᓯᒋᔭᐅᔪᓄᑦ ᓄᓇᓕᖕᓄᑦ, ᐊᒻᒪ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᐅᑭᐅᖅᑕᖅᑐᒥ .
ᓯᕗᓪᓕᖅᐹᒥ ᐊᕐᕌᒍᒥ ᐃᓕᓐᓂᐊᕐᓂᐅᔪᒥ, ᐃᓚᐅᔪᑦ ᐱᕙᓪᓕᐊᑎᑦᑎᓂᐊᖅᐳᑦ ᐱᒻᒪᕆᐅᔪᓂᑦ ᐊᔪᙱᓐᓂᐅᔪᓂᑦ ᐱᔭᐅᔭᕆᐊᖃᖅᑐᓂᒃ ᐱᒋᐊᖅᑎᑦᑎᓂᕐᒥᑦ ᐊᒻᒪ ᐱᕈᖅᑎᑦᑎᓂᕐᒥ ᒥᑭᑦᑐᓂᑦ ᓇᖕᒥᓂᕆᔭᐅᔪᒥᑦ, ᐊᒻᒪ ᐊᕐᕌᒍ ᓄᙳᐊᓂ ᑐᑭᒧᐊᒃᑎᑕᐅᓂᐊᖅᐳᑦ ᐋᖅᑭᒃᓱᐃᓂᕐᒥ ᓇᖕᒥᓂᕆᔭᐅᔪᓄᑦ ᐸᕐᓇᐅᑎᒥᒃ. ᐊᕐᕌᒍ ᒪᕐᕉᖕᓄᒃ, ᐃᓚᐅᖃᑕᐅᔪᒪᔪᑦ ᐃᑲᔪᖅᓱᖅᑕᐅᖏᓐᓇᕐᓂᐊᖅᑐᑦ (ᓲᕐᓗ, ᐃᓕᓴᐃᔨᖃᖅᑎᑕᐅᓗᑎᒃ, ᐃᖅᑲᓇᐃᔭᖃᑎᒌᒍᓐᓇᕐᓗᑎᒃ, ᐊᑭᖃᓐᖏᑦᑐᓂᒃ ᐱᓕᒻᒪᒃᓴᐃᓗᑎᒃ ᐃᓕᓐᓂᐊᕈᑎᒃᓴᓂᒃ, ᐃᖅᑲᓇᐃᔭᖅᑎᑖᕋᓱᐊᖅᑎᓪᓗᒋᑦ ᐃᑲᔪᖅᓱᖅᑕᐅᓗᑎᒃ) ᐱᒋᐊᖅᑎᑦᑎᓕᕌᖓᑕ ᐅᕝᕙᓘᓐᓃᑦ ᐱᕈᖅᐸᓪᓕᐊᑎᓪᓗᒋᑦ ᒥᑭᑦᑐᓂᒃ ᓇᖕᒥᓂᖁᑎᒥᓂᒃ. ᐊᒻᒪᓗᑦᑕᐅᖅ, ᒥᑭᓗᐊᖅᑐᑦᑦ ᐃᓚᐅᖃᑕᐅᔪᑦ ᓂᕈᐊᖅᑕᐅᓂᐊᕐᒥᔪᑦ ᑮᓇᐅᔭᖃᖅᑎᑦᑎᓂᐊᕐᓗᑎᒃ ᐊᖅᑯᑎᒋᓪᓗᒍ Amp Incubator, ᐅᑎᖅᑎᑕᐅᓗᑎᒃ ᐊᖏᖅᓯᒪᓂᖏᓐᓄᑦ ᐃᓚᖓᓂᒃ ᓯᕗᓂᒃᓴᒥ ᑮᓇᐅᔭᓕᐊᖑᓂᐊᖅᑐᓂᒃ ᑲᔪᓯᔪᓄᑦ Amp Up−ᓄᑦ ᐱᓕᕆᐊᓄᑦ, ᑕᐃᒪᐃᒻᒪᑦ ᑲᔪᓯᑦᑎᐊᕐᓂᖏᑦ ᐊᑐᖅᑕᐅᓂᐊᖅᑐᑦ ᐃᑲᔪᖅᑐᐃᔾᔪᑕᐅᓗᑎᒃ ᓯᕗᓂᒃᓴᒥ ᑲᔪᓯᑦᑎᐊᕐᓂᖏᓐᓄᑦ ᐊᓯᖏᓄᑦ. ᖃᕆᓴᐅᔭᒃᑯᑦ ᐋᖅᑭᒃᓱᐃᔾᔪᑎᓂᒃ ᑕᕝᕙᓂ ᐱᓕᕆᐊᒥ, ᐱᖃᓯᐅᑎᓪᓗᒋᑦ ᐃᑲᔪᖅᓱᐃᓂᖅ ᓇᖕᒥᓂᕆᔭᐅᔪᓂᒃ ᓴᖅᑭᔮᖅᑎᑦᑎᔪᒪᔪᓂᒃ ᑖᒃᑯᓂᖓ ᓂᐅᕕᐊᒃᓴᐅᓗᑎᒃ.
ᓂᕆᐅᒃᐳᒍᑦ 80%-ᖑᔪᑦ ᐃᓚᐅᖃᑕᐅᔪᑦ ᓇᓗᓇᐃᖅᓯᓯᒪᓂᐊᕐᓂᖏᓐᓂᒃ ᐃᓄᒃᑎᑐᑦ (ᐱᓗᐊᖅᑐᒥᒃ ᐃᓄᐃᑦ), 70%-ᖑᔪᑦ ᐊᕐᓇᐅᓂᖏᓐᓂᒃ, 100%-ᖑᔪᑦ ᑮᓇᐅᔭᓕᐅᓗᐊᙱᑦᑐᑦ ᐃᓄᐃᑦ, 10%-ᖑᔪᑦ LGBTQ2S+-ᖑᓂᕋᖅᑕᐅᓪᓗᑎᒃ, 15%-ᖑᔪᑦ ᑎᒥᒥᒍᑦ ᐊᔪᕈᑎᓖᑦ, ᐊᒻᒪᓗ 50%-ᖑᔪᑦ ᐃᓄᐃᑦ ᐃᓕᓐᓂᐊᕐᕕᐊᓗᖕᒥ ᐱᔭᕇᖅᓯᓯᒪᙱᑦᑐᑦ. ᐊᑐᕐᓂᐊᖅᑐᒍᑦ ᐋᖅᑭᒃᓱᐃᖃᑎᒌᖕᓂᒃᑯᑦ ᓄᓇᓕᖕᓂ ᐊᐅᓚᑕᐅᔪᓂᒃ ᐱᓕᕆᐊᒃᓴᓂᒃ (ᓲᕐᓗ, ᐋᖅᑭᒃᓱᐃᓗᑕ ᐃᓕᓐᓂᐊᕈᑎᒃᓴᓂᒃ) ᐊᒻᒪᓗ ᐃᑲᔪᖅᓱᐃᓂᐊᖅᑐᒍᑦ (ᓲᕐᓗ, ᖃᕆᓴᐅᔭᕋᓛᓄᑦ, ᖃᕆᓴᐅᔭᒃᑯᑦ ᑐᓴᐅᒪᖃᑦᑕᐅᑎᔾᔪᑏᑦ, ᐸᐃᕆᕕᖕᒧᑦ ᐃᑲᔫᑎᑦ) ᒥᑭᒡᓕᒋᐊᖁᓪᓗᒋᑦ ᖃᕆᓴᐅᔭᒃᑯᑦ, ᑮᓇᐅᔭᓕᐅᕈᑎᖃᕋᓱᐊᕐᓂᕐᒧᑦ, ᐃᓅᓯᓕᕆᓂᕐᒧᓪᓗ ᐊᒡᕕᐊᕈᑕᐅᔪᑦ ᐃᓚᐅᓂᕐᒧᑦ. ᐋᖅᑭᒃᓯᒪᓂᖃᖅᑎᓪᓗᑕ ᐅᑭᐅᖅᑕᖅᑐᒥ ᐊᒻᒪᓗ ᑲᓯᓐᖓᖃᑎᒌᒍᑎᖃᖅᑎᓪᓗᑕ 100-ᓂᒃ ᑲᑐᔾᔨᖃᑎᒌᓂᒃ/ᐃᖅᑲᓇᐃᔭᖅᑎᑦᑎᔨᓂᒃ ᑲᓇᑕᓕᒫᒥ, ᓇᓗᙱᓚᒍᑦ ᓇᖕᒥᓂᖅ ᐋᖅᑭᒃᓱᐃᔪᓐᓇᕋᑦᑕ ᐊᒻᒪᓗ ᐃᓕᖅᑯᓯᕐᒧᑦ ᑭᐅᔪᓐᓇᖅᑐᓂᒃ ᐃᑲᔪᖅᓱᐃᓂᕐᒥᒃ ᐱᔨᑦᑎᕋᖅᑕᐅᙱᓗᐊᖅᑐᓄᑦ ᓇᖕᒥᓂᖃᖅᑎᐅᔪᓄᑦ.
ᑐᕌᒐᕆᓪᓚᕆᒃᑕᕗᑦ ᓱᕋᐃᓇᓱᐊᕐᓂᖅ ᐋᖅᑭᒃᓯᒪᓂᒃᑯᑦ ᐊᒡᕕᐊᕈᑎᓂᒃ ᓵᙵᔭᐅᕙᒃᑐᓂᒃ ᑮᓇᐅᔭᓕᐅᓗᐊᙱᑦᑐᓄᑦ ᓇᖕᒥᓂᖃᖅᑎᐅᔪᓄᑦ ᓄᓇᓕᕋᓛᖑᓂᖅᓴᓄᑦ, ᐅᖓᓯᒋᔭᐅᔪᓄᑦ ᓄᓇᓕᖕᓄᑦ, ᐊᒻᒪᓗ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ, ᐱᕈᖅᓴᐃᓇᓱᒃᑎᓪᓗᑕ ᐃᓚᐅᑎᑦᑎᓂᖅᓴᐅᔪᒥᒃ ᐊᒻᒪᓗ ᐃᑲᔪᖅᑐᐃᓂᖅᓴᒥᒃ ᓇᖕᒥᓂᖃᖅᑎᐅᔪᓂᒃ ᑲᓇᑕᒥ.
ᑐᓴᒐᒃᓴᒃᑲᓐᓃᑦ ᓴᖅᑭᓐᓂᐊᖅᑐᑦ!
ᑕᐅᑐᓐᖑᐊᕈᓐᓇᕋᔅᓯ, ᖁᕕᐊᓱᑦᑎᐊᖅᑐᒍᑦ ᑕᒪᑐᒥᖓ ᐱᕕᒃᓴᖃᖅᑎᑕᐅᒐᑦᑕ, ᐊᒻᒪᓗ ᖁᔭᓕᑦᑎᐊᖅᖢᑕ ᓂᕈᐊᖅᑎᓄᑦ ᑲᑎᒪᔨᕋᓛᓄᑦ ᐊᒻᒪᓗ TD ᑮᓇᐅᔭᒃᑯᕕᖕᒧᑦ ᑕᒪᓐᓇ ᐊᔪᕐᓇᕈᓐᓃᖅᑎᑕᐅᓚᐅᕐᒪᑦ. ᓱᓕ ᐱᒋᐊᓕᓵᕋᑦᑕ, ᑭᓯᐊᓂ ᑐᓴᖅᑎᑦᑎᒃᑲᓐᓂᕐᓂᐊᖅᑐᒍᑦ ᒥᑭᑦᑐᓄᑦ ᓇᖕᒥᓂᕆᔭᐅᔪᓄᑦ ᐱᓕᕆᐊᖑᔪᒥᒃ ᐅᐊᑦᑎᐊᕈᒃᑲᓐᓂᖅ - ᖃᐅᔨᒪᓂᐊᖅᐳᓯ!